12 Sentyabr 2019

Uşaqlarda görmə problemləri

Bakı, 11 sentyabr, AZƏRTAC

Son altı il ərzində ölkəmizdə 13 yaşadək uşaqlar arasında göz xəstəliklərindən əziyyət çəkənlərin sayı artıb. Ötənilki statistikaya görə, hər 10 min uşaqdan 125-nin görmə problemi var.

Bu barədə AZƏRTAC-a məlumat verən Bakı Baş Səhiyyə İdarəsinin Baş Oftalmoloqu Sevda Bəşirovanın dediyinə görə, körpələr dünyaya gələrkən həkim tərəfindən ilkin olaraq göz müayinəsi aparılmalıdır. Körpə yarımçıq doğulub və küvezdə oksigen yardımı alıbsa, onda mütləq şəkildə göz dibi müayinəsi aparılmalıdır: “Bəzi xəstəliklər anadangəlmə olur və onları vaxtında aşkar etmək lazımdır ki, uşağın gələcək həyatında ciddi görmə problemi yaranmasın. 1 yaşınadək çəpgözlük müayinəsi, 2-3 yaşlarınadək refraksiyalar, məktəbqabağı yaşlarda görmə qabiliyyəti yoxlanılmalı və uşaq məktəbə gedəndən sonra ildə bir dəfə çekap müayinədən keçməlidir”.

Əvvəllər yuxarı sinif şagirdlərində rast gəlinən görmə problemləri ilə indi azyaşlı uşaqlar da üzləşirlər. Əvvəllər tədqiqatçılar hesab edirdilər ki, bunun əsas səbəbi uşaqların qapalı məkanlarda çox vaxt keçirməklə gözlərini təbii gün işığından məhrum etmələridir. Bunun nəticəsində göz lazımi qida və vitaminlərlə təmin olunmur.

Həkim-oftalmoloq deyib: “Hazırda məktəbli miopatiyası deyilən hallarla tez-tez üzləşirik. Uşaqların böyük əksəriyyətində görmə zəifliyi çoxdur, onlar miopatiya, hipermetriya və yaxud astiqmatizmdən əziyyət çəkirlər. Belə hallarda mütləq ildə bir dəfə həkim müayinəsindən keçmək lazımdır. Məktəbdə yazı lövhəsinə yazılanları görməmək, uzaqda olan yazıları oxuya bilməmək, yaxud yazıb- oxuyarkən müəyyən görmə problemləri ilə üzləşmək, baş ağrısı olması, gözlərin ovuşdurulması, qırpılması və yığılması zamanı mütləq həkimə müraciət etmək lazımdır”.

Həkimin verdiyi məlumata görə, məktəb dövrü uzağı və yaxını görmə, astiqmatizm kimi çatışmazlıqların yaranması üçün təhlükəli dövr sayılır, çünki həmin mərhələdə gözlər çox yüklənir. Uşaqların gün ərzində dərs oxuması, yaxın məsafəyə çox baxması gözlərdə problemin yaranmasına səbəb olur. Çünki yaxın məsafəyə baxmaq göz əzələlərinin spazmına, nəticədə isə görmə qabiliyyətinin zəifləməsinə aparıb çıxarır.

01 İyun 2020
Yanıq zamanı düzgün şəkildə göstərilən ilkin yardım sonrakı sağalma prosesi üçün vacib şərtdir. e-tibb.az xəbər verir ki,…
22 May 2020
Uşaqlar niyə tərləyir? Uşaqlarda ilk 1 yaşda və cinsi inkişaf dövründə daha da çox tərləmə…
16 May 2020
Müasir zamanda uşaqlar erkən yaşlardan etibarən uzun müddət  ərzində vaxtlarını televizor (telefon) qarşısında keçirirlər. Xüsusilə…