Dr. Nərmin Əzizova

Azərbaycanın ilk milli pediatrik internet portalı olan – PEDİATRİYA.AZ uşaqlarımızın sağlam gələcəyi naminə ailələrin tibbi maarifləndirilməsi, həmçinin vacib tibbi xəbərlərin ictimaiyyətə çatdırılması məqsədilə yaradılmışdır. Sayt həkim Nərmin Əzizova tərəfindən 2017-ci il 18 noyabr tarixində yaradılmışdır.

Pediatriya.az saytının təsisçisi Nərmin Əzizova 3 fevral 1991-ci il tarixdə Bakı şəhərində anadan olmuşdur. 2008-2014-ci illərdə Azərbaycan Tibb Universitetinin Pediatriya fakültəsində təhsil almış və Universiteti fərqlənmə diplomu ilə bitirmişdir. 2014-cü ildə rezidenturaya daxil olmuş və 2014-2018-ci illərdə rezidenturanı Ə.F.Qarayev adına 2 saylı Klinik Uşaq Xəstəxanasında keçmişdir.

2018-ci ildə rotasiya qaydasında Türkiyə Respublikasının Ankara şəhərində yerləşən Hacettepe Xəstəxanasında rezidenturanı davam etdirmişdir.

Həmin il rezidenturanı bitirmiş və imtanlarını müvəffəqiyyətlə verərək Azərbaycan Respublikası Səhiyyə Nazirliyinin göndərişi əsasında K.Y.Fərəcova adına Elmi-Tədqiqat Pediatriya İnstitutuna həkim vəzifəsinə təyin olunmuşdur. Hal-hazırda həmin İnstitutun Yarımçıqdoğulmuşların reanimasiyası və intensiv terapiya şöbəsinin həkim-neonatoloqu vəzifəsində çalışır.

2019-cu ilin yanvar ayından elmi-pedaqoji fəaliyyət ilə məşğul olmağa başlamış və əlavə iş yeri olaraq 1 nömrəli Bakı Tibb Kollecinin müəlliməsi vəzifəsinə təyin olunmuşdur. 2019-2022-ci illərdə sözügedən tibb kollecində pedaqoji fəaliyyət ilə məşğul olmuşdur.  

2019-cu ilin dekabr ayında dissertanturaya qəbul ilə əlaqədar keçirilən müsabiqədə iştirak etmiş, zəruri imtahanları müvəffəqiyyətlə vermiş və K.Y.Fərəcova adına Elmi-Tədqiqat Pediatriya İnstitutuna dissertant kimi qəbul olunmuşdur. Hal-hazırda həmin İnstitutun dissertantıdır.

2023-cü ilin sentyabr ayından Azərbaycan Tibb Universitetinin I Uşaq Xəstəlikləri kafedrasının əməkdaşıdır. 

Nərmin Əzizova ailəlidir, 2 övladı vardır.