Yenidoğulmuşun Göbək Bağına Qulluq barədə tövsiyələr. Həkim Nərmin Əzizova
Dr. Nərmin Əzizova
Neonatoloq, K.Y. Fərəcova adına Pediatriya Elmi-Tədqiqat İnstitutunun Yenidoğulmuşların Reanimasiya və İntensiv Terapiya Şöbəsi; Azərbaycan Tibb Universiteti, I Uşaq Xəstəlikləri kafedrası; Pediatriya.az saytının təsisçisi.
Yenidoğulmuşun Göbək Bağına Qulluq barədə tövsiyələr
Doğuşdan sonra həkim körpənin göbək bağını kəsir və sıxacla bağlayır. Göbək üzərində qalan 1 sm-lik hissə adətən 7-21 gün ərzində quruyub düşür. Bu müddət ərzində infeksiyanın qarşısını almaq üçün düzgün göbək qulluğu vacibdir.
Göbək bağına qulluq üçün tövsiyələr
- Antiseptik istifadə edin: Göbək hissəsini gündə 4 dəfə həkiminizin məsləhət gördüyü antiseptik məhlulla (70%-li spirt və ya xlorheksidin) təmizləyin;
- Əllərinizi yuyun: Körpənin göbəyinə toxunmazdan əvvəl əllərinizi sabun və su ilə yumaq mütləqdir;
- Düzgün təmizləmə üsulu: Steril tənzif və ya pambığa antiseptik məhlul tökün, sonra göbək hissəsini içəridən xaricə doğru yumşaq şəkildə silin. Antiseptikin tam qurumasını gözləyin;
- Bezi düzgün bağlayın: Uşaq bezini göbəkdən aşağı bağlayın ki, göbək hissəsi quru qalsın və sidik və ya nəcisə toxunmasın.
Nələrdən etmək olmaz:
- Göbək hissəsini bezin və ya sarğının altında saxlamayın;
- Göbək bağını zorla qopartmayın – təbii şəkildə düşməlidir;
- Yağlar, pudralar və ya bitki mənşəli vasitələrdən istifadə etməyin.
Hansı hallarda həkimə müraciət etmək lazımdır?
Aşağıdakı hallarda mütləq həkimə müraciət edin:
- Göbək ətrafında qızartı, şişkinlik və ya istilik hiss müşahidə edirsizsə;
- Pis qoxulu axıntı və ya irin varsa;
- Göbək qanayır və qanaxma dayanmazsa;
- Körpədə hərarət və ya səbəbsiz ağlama halları varsa (bu, infeksiyanın əlaməti ola bilər);
- Göbək 21 gün ərzində düşməyibsə.
Ümumdünya Səhiyyə Təşkilatının (ÜST) tövsiyələri
ÜST göbək hissəsinə hər hansı ənənəvi vasitələrin çəkilməsini qəti şəkildə tövsiyə etmir. Əksinə, infeksiya riski yüksək olan bölgələrdə ilk 7 gün ərzində 4%-li xlorheksidin məhlulunun istifadəsi məsləhət görülür. Araşdırmalar göstərir ki, xlorheksidin istifadəsi inkişaf etməkdə olan ölkələrdə neonatal infeksiyaları 75%-ə qədər azalda bilər.
Göbək bağı infeksiyaları ilə bağlı statistik məlumatlar
- Omfalit (göbək infeksiyası) inkişaf etmiş ölkələrdə yenidoğulmuşların 0.7%-də rast gəlinir, lakin aşağı resurslu bölgələrdə bu göstərici daha yüksəkdir;
- Yenidoğulmuşlarda sepsis (qan infeksiyası), tez-tez düzgün göbək qulluğunun olmaması ilə əlaqəlidir və dünyada körpə ölümlərinin 15%-nə səbəb olur;
- Düzgün göbək baxımı və antiseptik istifadəsi yenidoğulmuş ölümlərini bəzi bölgələrdə 23%-ə qədər azalda bilər.
Bu tövsiyələrə əməl etməklə körpənizin göbək hissəsinin təhlükəsiz və infeksiyasız sağalmasını təmin edə bilərsiniz.