01 Oktyabr 2019

D vitamini infeksion xəstəliklərdən qoruyur?

“Bədənimizdə əhəmiyyətinə görə öndə olan vitaminlərdən biri də D vitaminidir. D vitamini bizim körpə və uşaqlarımızın sümük sisteminin inkişafı, yəni sümüklərinin sağlam böyüməsinin təmin edilməsi üçün çox əhəmiyyətlidir”.

Bunu pediatr-neonatoloq, uzman həkim Altay Abdullaoğlu açıqlayıb.

Pediatr deyib ki, D vitamini körpələr doğulduqdan sonra onlara verilir və ən az 1 il, ümumiyyətlə, 3 yaşına kimi verilməsi profilaktik olaraq nəzərdə tutulur: “D vitamini qidalarımızda çox azdır. D vitamini əsasən günəş şüalarından əldə olunur. Bu baxımdan nəzərə alsaq ki, bu il yay çox qısa davam edib və uşaqlarımız kifayət qədər günəşlənə bilməyib, ona görə də D vitaminin profilaktik olaraq verilməsi daha da məqsədəuyğun hesab olunur. Bu məsələdə digər məqam isə D vitamininin infeksion xəstəliklərə qarşı müqaviməti artırmasıdır. D vitamini bədənimizin immun sistemini aktivləşdirir və xəstəliklərə tutulma riskini azaldır. Nəzərə alsaq ki, havaların soyuması ilə əlaqədar infeksion xəstəliklər, xüsusilə, tənəffüs yollarının xəstəlikləri artmaqdadır, bu zaman D vitaminin əhəmiyyəti daha da yüksəlir”.

Onun sözlərinə görə, D vitamininin çatışmazlığı qan analizi ilə müəyyən edilir və müalicə də bu istiqamətdə aparılır. Qanda vitaminin vəziyyətinə baxılmadan kor-koranə yüksək dozalarla verilməsi qətiyyən doğru deyil. Bu vitamin bədəndə yığılıb qalır, ona görə yüksək dozada verəndə ciddi fəsadlara səbəb ola bilər: “Həkimlərimiz və valideynlərimiz bu məsələdə çox diqqətli olmalıdırlar. Körpələr dünyaya gəlməmiş anaların da qanında D vitaminin nə dərəcədə olması araşdırılmalıdır. Çünki körpələrə profilaktik olaraq təyin olunan bu vitamin analara, xüsusi ilə hamilələrə çox vacibdir. Uşağına süd verən analarda bu hal xüsusilə müşahidə olunur: müayinə zamanı D vitamini çox aşağı səviyyəni göstərir. Tövsiyə olunur ki, analar da müayinə olunsun. Çünki ana sağlam və südündə D vitamini olarsa, daha çox faydalı olar. Ana südü verməsə belə, ananın da sağlam olması, az xəstələnməsi, psixoloji vəziyyətinin yaxşı olması (çünki D vitaminin azlığı böyüklərdə psixoloji vəziyyətə təsir edir) sağlam uşaq böyütməsi mənasına gəlir”.

e-tibb.az

21 Oktyabr 2019
Elə hesab etməyin ki, depressiya yalnız böyüklərə məxsus problemdir. Uşaq nədir, depressiya nədir düşünənlər böyük…
19 Oktyabr 2019
Körpəmdəki qırmızı səpkilər normaldır? Bəli, həyatının ilk günlərində bir çox körpənin gövdəsində və üzündə qızarıq…
15 Oktyabr 2019
Nəfəs borusunda qələm başlığı qalan və boğulmaq təhlükəsi ilə üzləşən azyaşlı xilas olunub. Bu barədə…