Süd dişləri çıxan uşaqlarda bu əlamətlər varsa...
Uşaqlarda süd dişləri nə zamandan çıxır? Dişlərin çıxması nə zaman yekunlaşır? Dişlər çıxan zaman uşaqlarda xəstəlik əlamətlərinin olması normaldırmı? Süd dişlərinə qulluq necə olmalıdır?
Bu suallar yəqin ki, çoxlarını düşündürür. e-tibb.az pediatr-neonatoloq, uzman həkim Altay Abdullaoğlunun süd dişləri ilə bağlı fikirlərini təqdim edir.
Süd dişlərinin uşaqlarda çənə və üzün formalaşmasında, daha sonra isə danışma qabiliyyətinin inkişafında rolu böyükdür. İlk süd dişi alt çənədə 6 aylıqdan etibarən çıxmağa başlayır və 2,5-3 yaşa qədər davam edir və sonunda 20 süd dişi olur. 7 yaşlarında isə ön kəsici süd dişləri tökülməyə başlayar, 9-10 yaşlarında isə tam tökülüb yerini daimi dişlərə verir. Bəzən diş çıxarma daha tez və ya daha gec ola bilər. Hər uşaqda bu fərqli olur. Diş çıxarma zamanı uşaqlarda həmin nahiyədə qızarıqlıq, ağrı, ağız suyunun artması, əlini tez-tez ağzına aparmaq, qaşıntı, narahatlıq, iştahasızlıq, yuxunun pisləşməsi ola bilər.
Bəzən bu dövrdə qusma, qəbizlik, nəcisin yumşalması da ola bilər. Bu zaman uşaqları rahatlandırmaq məqsədilə diş qaşıyıcılarından istifadə etmək olar. Uşaq çox narahat olarsa, ara-sıra ağrıkəsici təsirə malik gellərdən də az miqdarda istifadə etmək olar.
Ancaq yüksək temperatur, ishal kimi halları da diş çıxarma ilə əlaqələndirmək düzgün deyil.
Dişləri çıxdığı vaxtdan etibarən təmizləmək lazımdır. İlk vaxtlarda nəmli bezlə, 1 yaşdan yuxarı isə diş fırçası ilə təmizlənməlidir.
Bəzən süd dişləri sürətlə çürüyür. Buna irsiyyət faktoru, hamiləlik dövründə qidalanma, yaşadığı mühit, kalsium və D vitamini çatışmazlığı səbəb ola bilir. Süd dişləri çıxan zamandan etibarən təmizliyinə diqqət edilməli, 2 yaşdan etibarən hər qidalanmadan sonra ağız boşluğu yaxalanmalı, şəkərli qidalardan məhdud şəkildə istifadə edilməlidir. Çünki vaxtından əvvəl onların düşməsi gələcəkdə çıxan daimi dişlərin düzgün yerləşməməsinə və bir sıra problemlərin yaranmasına səbəb ola bilər.