Yayda uşaqların qidalanmasına DİQQƏT: Bunlar mədə-bağırsaq pozuntusu yarada bilər

Yayda uşaqlarda mədə-bağırsaq pozuntularına da geniş rast gəlinir. Çox zaman qida zəhərlənmələrindən, eləcə də infeksiyalardan qaynaqlanan bu pozuntular ağır fəsadlara da yol açır. Uşaqları bu problemlərdən necə qorumaq olar?

e-tibb.az “Erkən Uşaqlıq Dövründə İnkişaf” layihəsinin (UNICEF-in və Heydər Əliyev Fondunun Regional İnkişaf İctimai Birliyinin birgə icra etdiyi layihə) bununla bağlı tövsiyələrini təqdim edir:

Süd məhsulları ilə ehtiyatlı olmaq vacibdir. Yayda uşaq qidasına aid olan südlü məhsullarda-sıyıq və ya dondurmalarda, kremli şirniyyatlarda bakterial floranın sayı çox sürətlə artır, toksiki maddələr əmələ gəlir. Süd məhsullarını qış aylarında soyuducudan kənarda 3-4 saat saxlamaq mümkündürsə, yayda bir saatdan artıq saxlamaq mümkün deyil. Qidanın tərkibindəki bakteriyalar sürətlə inkişaf edərək toksiki xarakter alır.

Xarab qidanı qəbul etdikdən 1-2 saat sonra mədəyə böyuk miqdarda mikrob daxil olaraq qızdırma, titrəmə və qusmaya səbəb olur. Vaxtında uşaqlara düzgün yardım göstərilmədikdə isə bu, mədə-bağırsaq pozuntusu, sinir sisteminin sıradan çıxması və hətta qıcolma ilə nəticələnə bilər.
⠀
Analara məsləhət görülür ki, yemək hazırlayarkən onun keyfiyyətinə və temperaturuna, sanitar-gigiyenik qaydalara fikir vermək lazımdır. Yemək hazırlamamışdan öncə əllər yuyulmalıdır, əks halda dizenteriya xəstəliyinə yoluxma təhlükəsi ola bilər.
Mədə-bağırsaq pozuntusu ən çox 3 yaşlı uşaqlarda olur. Qida rasionuna fikir vermədən bir neçə çeşiddə olan qidanı ardıcıl yeyəndədə həm uşağın, həm də böyüklərin səhhətində problemlər yaranır.
Qeyd olunub ki, havanın hərarəti nəzərə alınmalıdır. Uşaqlar temperatura çox həssas, isti və soyuğa dözümsüz olurlar. Yayda ana isti havaya arxayın olaraq uşağa soyuq qida verir. Külək, qəfil hava axını nazik geyinmiş, ya da qalın geyinib tərləmiş uşağa pis təsir edir. İstidə uşaqlar küçədə oynadıqdan sonra evə qaçaraq dərhal soyuq su içməyə tələsir. Belə hallarda valideynlər xüsusilə diqqətli olmalıdırlar.
Daha sonra qeyd olunub ki, yayda uşaqları su vannasına öyrətmək yaxşıdır. Bu, immuniteti artırır, dərini təmizləyir, qan dövranını yaxşılaşdırır. İmkan olduqda uşaqlar hər gün çimməlidirlər. Uşaqları kölgədə olmaq şərtilə açıq havada gəzdirmək də faydalıdır.