Vaxtından əvvəl doğuş təhlükəsi ilə ETMGİ-yə müraciət edən hamilə qadın əkiz körpələr dünyaya gətirib
Bakı, 7 mart, AZƏRTAC
Hamiləliyin 28-ci həftəsində vaxtından əvvəl doğuş təhlükəsi ilə Səhiyyə Nazirliyinin tabeliyində fəaliyyət göstərən Elmi-Tədqiqat Mamalıq və Ginekologiya İnstitutuna (ETMGİ) müraciət edən hamilə qadın övladlarına qovuşub.
AZƏRTAC ETMGİ-nin rəsmi feysbuk səhifəsinə istinadla bildirir ki, pasiyent Ginekologiya şöbəsinin müdiri, həkim mama-ginekoloq, dosent Fatma Hacıyevanın nəzarətində olub. Müvafiq müayinələrdən sonra ona vəziyyəti ilə əlaqədar olaraq Hamiləliyin patologiyası şöbəsində stasionar müalicə planı təyin olunub.
Hamiləliyin 36-37-ci həftələrində göstəriş olduğundan F.Hacıyeva tərəfindən icra olunan uğurlu qeysəriyyə əməliyyatı ilə əkiz körpələr dünyaya gəlib.
Çəkiləri müvafiq olaraq 2 kilo 900 və 2 kilo 770 qram olan kişi cinsli əkizlər heç bir reanimasion tədbirə ehtiyac olmadan Fizioloji şöbədə neonatoloq G.Məmmədzadənin stasionar nəzarətindədir. Hazırda yenidoğulmuşların vəziyyəti stabildir.