Uşaqların sağlamlığı, təhsili və sosial inkişafı ilə əlaqədar kurs başa çatıb
Bakı, 12 dekabr, AZƏRTAC
Azərbaycana birgə Yardım Təşkilatı (UAFA) və ABŞ Vaşinqton Corcktaun Universitetinin Uşaq və İnsan İnkişafı Mərkəzinin birgə təşəbbüsü əsasında təşkil olunan CHED (uşaq vaxtı sağlamlıq, təhsil və sosial inkişaf üzrə baza kursu) ilk kursu keçirilib.
Əziz Əliyev adına Azərbaycan Dövlət Həkimləri Təkmilləşdirmə İnstitutunun mətbuat xidmətindən AZƏRTAC-a verilən məlumata görə, məqsəd uşaq inkişafı sahəsində işləyən mütəxəssislər üçün beynəlxalq akkreditasiyalı kursları təşkil edən uşaqların sağlamlığı, təhsili və sosial inkişafı sahəsində akademik mərkəzin yaradılmasıdır.
Kurs başa çatandan sonra iştirakçılar test imtahanı verərək 45 saatlıq praktiki monitorinqdə iştirak ediblər. Monitorinq prosesi hər bir iştirakçının kurs müddətində əldə etdiyi bilikləri təcrübədə uğurla tətbiq etməsi məqsədi daşıyıb.
Ölkəmizdəki ABŞ səfirliyinin dəstəyi ilə təşkil olunmuş kursun yekun tədbirində ABS-n Corctaun Universitetinin Uşaq İnkişafı Mərkəzinin direktoru, pediatriya fakültəsinin professoru, “Erkən müdaxilə üzrə məzmun” proqramının rəhbəri Toby Long iştirakçılar arasında testdən və virtual (online) qiymətləndirmədən uğurla keçənlərə sertifikatlar təqdim edib. Azərbaycan Dövlət Həkimləri Təkmilləşdirmə İnstitutunun pediatriya kafedrasının dosenti Mətanət Qaraxanova da sertifikat alanlar arasında olub.