Alimentlər barədə: sual-cavab. Yazı II

Sual: Övladım yetkinlik yaşına çatıb. Lakin, o heç bir yerdə işləyə bilmir. Əmək qabiliyyəti yoxdur. Belə olan halda Qanunvericilik nə deyir?

Cavab: Ailə Məcəlləsinin 80-cı maddəsinə əsasən valideynlər əmək qabiliyyəti olmayan və maddi yardıma ehtiyacı olan yetkinlik yaşına çatmış övladlarını saxlamağa borcludurlar.

Sual: Bəs bu zaman alimentin miqdarı necə müəyyən olunur?

Cavab: Əgər aliment ödənilməsi barədə saziş yoxdursa, əmək qabiliyyəti olmayan yetkinlik yaşına çatmış övladların saxlanması üçün alimentin miqdarı məhkəmə tərəfindən hər ay ödənilməli olan sabit pul məbləğində müəyyən edilir. Bu zaman Məhkəmə tərəflərin ailə və maddi vəziyyəti, diqqətəlayiq olan digər maraqları nəzərə almaqla qərar çıxarır.

Sual: Bəs əgər uşaq valideyn himayəsindən məhrum olmuşdursa? Bu halda məsələlər necə tənzimlənir?

Cavab: Valideyn himayəsindən məhrum olmuş uşaqlara görə aliment valideynin qazancının və (və ya) başqa gəlirlərinin müəyyən hissəsi miqdarında və ya sabit pul məbləğində tutulur və uşağın qəyyumuna (himayəçisinə) və ya himayədar valideynlərə (atalığa, analığa) ödənilir.

Sual: Uşaq valideyn himayəsindən məhrum olmuş və sosial xidmət müəssisələrində yerləşdirilibsə bəs?

Cavab: Aliment həmin müəssisələrin hesabına keçirilir və hər bir uşağın özünə xərclənir. Qeyd edək ki, göstərilən müəssisələr həmin məbləğləri bankda saxlaya bilər. Məbləğlərin dövriyyəsindən alınan gəlirin 50 faizi uşaqların saxlanmasına sərf olunur. Uşaq bu müəssisələri tərk etdikdə aliment məbləğlərinin cəmi və alimentin dövriyyəsindən əldə olunan gəlirin 50 faizi uşağın adına bankda açılan hesaba köçürülür.

Sual: Aliment ödəyən valideyn yalnız Məhkəmə tərəfindən təyin olunan alimenti ödəməklə kifayətlənməlidir, yoxsa onun üzərinə digər xərclərdə də iştirak etmək barədə öhdəlik qoyula bilər?

Cavab: Valideynlərdən hər biri məhkəmə tərəfindən əlavə xərclərin ödənilməsinə cəlb oluna bilər. Bu zaman valideynlərin əlavə xərclərə cəlb olunması qaydasını məhkəmə müəyyən edir. Bu xərclərin miqdarı məhkəmə tərəfindən valideynlərin və uşaqların ailə və maddi vəziyyəti, eləcə də tərəflərin diqqətəlayiq olan digər maraqları nəzərə alınmaqla, hər ay ödənilməli olan sabit pul məbləğində müəyyən olunur. Həmçinin Məhkəmə valideynləri faktiki çəkilmiş əlavə xərclərə, eləcə də gələcəkdə çəkilməsi zəruri olan xərclərə cəlb edə bilər.