Səhiyyə naziri Saatlıda vətəndaşları qəbul edib

Azərbaycan Respublikasının Prezidenti İlham Əliyevin tapşırığına əsasən, mərkəzi icra hakimiyyəti orqanlarının rəhbərləri bölgələrdə səyyar qəbul günləri keçirir, vətəndaşların müxtəlif məsələlərlə bağlı müraciətlərinin həllinə kömək göstərirlər.
Səhiyyə naziri Oqtay Şirəliyevin növbəti belə qəbul günü Saatlı Mərkəzi Rayon Xəstəxanasında keçirilib.
Qəbul zamanı nazir Saatlı, Sabirabad, Şırvan, Hacıqabul sakinlərinin sağlamlıq problemləri, işlə təminat və s. məsələlərlə bağlı müraciətlərini dinləyib.
Qaldırılan məsələlər nazirliyin müvafiq qurumlarının əməkdaşlarının iştirakı ilə araşdırılıb. Onların bəziləri yerindəcə həllini tapıb. Digərləri ilə bağlı əlaqədar şəxslərə tapşırıqlar verilib.
Nazirliyin səlahiyyətlərinə aid olmayan məsələlər aidiyyəti üzrə çatdırılmaq üçün qeydiyyata alınıb və nəzarətə götürülüb.

tibbqazeti.az